�㽶��ƵAPP

Sefydlwyd y Bwrdd Ymgynghorol Alumni yn 2006 fel grŵp ymgynghorol anllywodraethol o alumni'r Brifysgol sydd wedi cadw mewn cysylltiad â'u alma mater ac sy'n rhannu diddordeb yn nhwf sylfaen gadarn o gyn-fyfyrwyr sy'n cymryd rhan ym materion y brifysgol. Diben y Bwrdd yw cynrychioli'r gymuned alumni ehangach a rhoi barn ac awgrymiadau i'r Brifysgol ar y materion hynny sydd o ddiddordeb i alumni. 

Mae aelodau'r bwrdd yn hyrwyddo ac yn cyfathrebu cenhadaeth a gweledigaeth Bangor, gan weithio i symud rhaglen gysylltiadau alumni'r Brifysgol yn ei blaen. Maent yn cefnogi’r Swyddfa Datblygu a Chysylltiadau Alumni mewn sawl ffordd, gan gynnwys cynorthwyo i greu sylfaen o arweinwyr gwirfoddol o blith alumni, cynllunio a rheoli digwyddiadau alumni a chynorthwyo i nodi aelodau newydd posibl neu alumni a allai fod yn barod i ymwneud â'r Brifysgol.

Aelodau Alumni

Cadeirydd:

Dr George Buckley (1993, Economeg)

George Buckley yw Prif Economydd y DU i Nomura. Ymunodd â Deutsche Bank fel Prif Economydd y DU ym 1998 ar ôl cwblhau doethuriaeth ym maes marchnadoedd tai a morgeisi ym Mhrifysgol Bryste.  Tra roedd ym Mryste, bu George yn darlithio a dysgu macro-economeg i israddedigion. 

Mae ganddo MSc mewn cyllid ac economeg o’r un brifysgol a BA economeg o Brifysgol Bangor.  Ef yw awdur y llyfr “What You Need to Know About Economics” (2011). 

Mae George hefyd yn un o aelodau sefydlu Grŵp 2020 Bangor, grŵp busnes i gyn-fyfyrwyr Bangor sy’n aros mewn cysylltiad â’r brifysgol ac yn cynorthwyo mewn amryw o ffyrdd, yn cynnwys codi proffil y brifysgol mewn marchnadoedd allweddol.  Penodwyd George yn gadeirydd y Bwrdd Ymghynorol Alumni ym mis Mawrth 2015.

Emyr Afan OBE (1985, Cymraeg)

Mae Emyr Afan OBE, Prif Swyddog Gweithredol Afanti Media Ltd yn gynhyrchydd teledu arobryn gyda Bafta, mae’n gyfarwyddwr aml-gamera ac mae’n greadigol ei syniadau. 

Ym 1995, cyd-sefydlodd Afanti Media (Avanti Media gynt), ac fel Prif Swyddog Gweithredol, adeiladodd un o’r cwmnïau teledu mwyaf hirhoedlog a llwyddiannus yng Nghymru, a’r cyfleusterau darlledu allanol mwyaf helaeth.

Mae cwmni Afanti yn uchel ei barch am ddarparu sioeau a fformatau hynod lwyddiannus, gan gynnwys rhaglenni dogfen, darllediadau allanol mawr, digwyddiadau adloniant a cherddoriaeth i ddarlledwyr cenedlaethol a rhyngwladol. Arweiniodd Emyr nifer o gomisiynau proffil uchel i’r rhwydwaith fel ''Showtime' a “Life Drawing Live!' ac 'Inside Classical' i’r BBC, a 'The Perfect Pitch' i Channel 4. Ymhlith y comisiynau diweddar y bu’n Gynhyrchydd Gweithredol arnynt mae ‘The World’s Biggest Cruise Ship’ i C4 a Secrets of the Lost Mines i BBC1.

Cafodd Emyr ei enwi’n Brif Swyddog Gweithredol Mwyaf Dylanwadol Cymru (Y Cyfryngau) yn 2024 a dyfarnwyd OBE iddo yn Rhestr Pen-blwydd y Brenin 2024 am ei wasanaethau i’r Cyfryngau a Cherddoriaeth. Cafodd ei enwi fel Entrepreneur y Flwyddyn yng Ngwobrau Busnes Caerdydd 2024 ar ôl ennill Busnes y Flwyddyn Caerdydd a Busnes Creadigol y Flwyddyn yn 2023. 

Astudiodd Emyr Gymraeg a Hanes ym Mhrifysgol Bangor a chyfarfu â'i wraig Mair a oedd hefyd yn astudio yn yr Adran Gerdd ym Mangor. Cyfarfu ei rieni hefyd pan oeddent yn astudio ym Mhrifysgol Bangor!

Tim Clay (1982, Bioleg Môr / Eigioneg)

Ymunodd Tim â'r diwydiant gwasanaethau ariannol ar ôl graddio o Brifysgol Bangor yn 1982.  Roedd yn gyd-sylfaenydd Clay Rogers & Partners Ltd, un o brif gwmnïau cynllunio ariannol annibynnol Birmingham, cyn i'r busnes hwn ddod i feddiant Succession Group ym Medi 2016.   Ymddeolodd Tim o'i rôl ymgynghorol gydag Succession ym mis Tachwedd 2023. 

Cyfarfu Tim â'i wraig, Laura, pan oedd y ddau yn astudio ym Mhrifysgol Bangor ac maent yn dychwelyd bob blwyddyn, gyda'u plant sydd bellach wedi tyfu i fyny, ar gyfer penwythnos yr Hen Ser.

Mae'n hoff o chwaraeon a chodi arian i elusennau ac yn Gadeirydd Rhanbarthol Gorllewin Lloegr The Lord's Taverners. Un o'i "dalentau" eraill yw bod yn un o'r prif gantorion mewn 'cover band', sydd dros y blynyddoedd wedi helpu i godi dros £500k i elusennau.

Jane Griffin (1993, Ffrangeg)

Jane yw sylfaenydd a chyfarwyddwr - ymgynghoriaeth cysylltiadau cyhoeddus strategol sy'n arbenigo mewn cysylltiadau cyhoeddus ar gyfer busnesau technoleg newydd a chwmnïau diwydiannol byd-eang.

Mae Jane yn gyn-ohebydd newyddion teledu a radio ar gyfer y BBC ac ITV ac mae ganddi fwy na phum mlynedd ar hugain o brofiad yn rhychwantu newyddiaduraeth a chysylltiadau cyhoeddus.

Mae hi wedi gweithio gydag asiantaethau ac yn fewnol ac arferai fod yn Bennaeth Cysylltiadau Cyfryngau Byd-eang a Seilwaith yn y cwmni peirianneg, rheoli prosiect ac adeiladu blaenllaw, Bechtel, am saith mlynedd. Bu hefyd yn Bennaeth Cyfathrebu Corfforaethol am bedair blynedd ar gyfer Angel Trains Group, sy'n rhan o Grŵp Banc Brenhinol yr Alban. Mae hi hefyd wedi gweithio mewn uwch-swyddi cysylltiadau â’r cyfryngau gyda BAE Systems, Network Rail, Eurotunnel ac ATOC. 

Kailesh Karavadra (1989, Peirianneg Electronig)

Kailesh Karavadra yw Rheolwr Marchnadoedd Twf Rhanbarth y Gorllewin Ernst and Young, yn Silicon Valley, ac mae'n gyfrifol am bortffolio sy'n cynnwys rhai o brif gwmnïau technoleg y byd.

Fe'i ganed yn Kampala, Uganda i rieni o India, a daeth i Brydain fel ffoadur. Dewisodd ddod i Fangor yn lle Prifysgol Rhydychen i astudio BSc mewn Peirianneg Electronig, a graddiodd gydag anrhydedd dosbarth cyntaf ym 1989, ac arhosodd ym Mangor i wneud gradd Meistr mewn Peirianneg, gan ychwanegu modiwlau cyfrifyddu ac ariannol ychwanegol at ei raglen Meistr.

Ymunodd Kailesh ag Ernst & Young fel cyfrifydd yn eu swyddfeydd yn Luton a Llundain ar ddechrau'r 1990au ac ym 1995, trosglwyddodd i swyddfa San Jose Ernst & Young ac ymfudodd i'r Unol Daleithiau

Ochr yn ochr â gyrfa brysur a bywyd teuluol, mae Kailesh yn gwneud gwaith gwirfoddol helaeth gyda nifer o elusennau gan gynnwys y Food Rescue Mission yn San Jose a rhaglen Small Business Ignite Mentoring y Maer i hybu twf busnesau bach. Derbyniodd Gymrodoriaeth er Anrhydedd gan Brifysgol Bangor am Wasanaethau i Fusnes yn 2017.

Mark Rigby (1979, Amaeth)

Ar ôl graddio o Fangor yn 1979, cwblhaodd Mark radd Meistr mewn Gwyddor Bwyd ym Mhrifysgol Nottingham. 

Gan gyfuno gwaith â'i gariad at rygbi, treuliodd Mark yr 20 mlynedd nesaf yn y sector masnach amaeth a'r sector amaeth-gemegolion a chael swyddi cyfrifol.  Ymunodd â grŵp teuluol T H White yn 1999 er mwyn sefydlu cyfadran llwytho lorïau genedlaethol (craeniau), a gyda Palfinger, aeth â nhw i'r safle cyntaf yn 2006 lle maent wedi aros byth ers hynny.  Cafodd Mark sedd ar fwrdd grŵp T H White (Holdings) yn 2006.  Cyn hynny roedd wedi bod yn aelod o fwrdd Cymdeithas Amaethyddol Prydain a Sumitomo Agriculture.  Mae'n briod ac mae ganddo ddau o blant sydd wedi gadael y nyth, ac mae'n parhau i chwarae rygbi i dîm hen chwaraewyr Bangor bob blwyddyn ac mae'n mwynhau bwyd a gwin da.

Dr Britta Taylor (2013, Bioleg Canser) 

Ar hyn o bryd mae Britta yn gweithio fel Rheolwr Treialon Clinigol ar Dreialon Clinigol Oncoleg, sy'n ei hysgogi a'i gwobrwyo bob dydd. Adeiladodd ar ei gradd mewn Bioleg Canser o Brifysgol Bangor gydag M.Sc. mewn Bioleg Bôn-gelloedd Moleciwlaidd a Datblygiadol o Brifysgol Bochum, yr Almaen, PhD mewn Oncoleg Pediatreg o Brifysgol Heidelberg, yr Almaen a Diploma Ôl-radd mewn Meddygaeth Arbrofol (Canser) o Brifysgol Manceinion. Mae Britta yn ddiolchgar iawn iddi gael y cyfle ym Mangor i arbenigo mewn Bioleg Canser mor gynnar yn ei gyrfa ac i weithio ym maes Oncoleg byth ers hynny. 

Mae Britta, sy’n dod yn wreiddiol o’r Almaen ac a symudodd i’r Deyrnas Unedig ar gyfer ei harholiadau Safon Uwch, yn falch o fod wedi aros yn y wlad am fwy o amser i astudio tuag at B.Sc. ym Mangor gan mai dyna lle y cyfarfu â'i gŵr bellach. Maent yn dychwelyd yn rheolaidd i Fangor i ail-fyw hen atgofion ac yn methu aros i fynd â'u merch yno i ddangos iddi lle y cyfarfu Mami a Dadi.

Yn ystod ei chyfnod ym Mhrifysgol Bangor, bu’n alwr ar gyfer ymgyrchoedd Cronfa Bangor y Swyddfa Datblygu a Chysylltiadau Cyn-fyfyrwyr, roedd yn rhan o’r gymdeithas RAG a’r Clwb Athletau y mae’n dal i gyfarfod â nhw’n rheolaidd ac yn dal i redeg/cystadlu mewn rasys â nhw. Ers graddio, mae Britta wedi parhau i fod yn gefnogwr mawr i Brifysgol Bangor ac wedi cyfrannu at nifer o weithgareddau myfyrwyr a recriwtio cyn-fyfyrwyr.

Peter Waziri (Bancio, Yswiriant a Chyllid, 1987)

Ar ôl graddio o Brifysgol Bangor yn 1988, bu Peter yn gweithio fel dadansoddwr yn y Sefydliad Cyllid Ewropeaidd cyn symud i’r Unol Daleithiau fel derbynnydd Ysgoloriaeth Sefydliad y Rotari yn cynrychioli Clwb Rotari Bangor. Gwasanaethodd fel hyrwyddwr diwylliannol ac ewyllys da yn cynrychioli Cymru gyfan a gogledd Lloegr. Wedi hynny, enillodd ei MBA mewn Rheolaeth Ryngwladol a Chyllid o Brifysgol Case Western Reserve yn Cleveland, Ohio. Ar hyn o bryd mae Peter yn aelod o fwrdd Xpress Wellness Urgent Care yn yr Unol Daleithiau. Mae hefyd yn gyn-aelod o Fwrdd Buddsoddi Prifysgol Bangor, a Reliance eHealth Collaborative, sef cydweithrediad cyfnewid gwybodaeth iechyd yn yr Unol Daleithiau.

Mae profiad Peter hefyd yn cynnwys gwasanaethu fel Prif Swyddog Cyllid gofal iechyd ar gyfer tri chwmni yn yr Unol Daleithiau, yn fwyaf diweddar yn Parkland Community Health Plan yn Texas. Cyn hyn, treuliodd dros 20 mlynedd yn gweithio yn y sectorau bancio buddsoddi/corfforaethol, ecwiti preifat, rheoli buddsoddiadau a marchnadoedd cyfalaf yn yr Unol Daleithiau. Penllanw hyn oedd sefydlu Warspite Capital Advisors lle bu’n cynghori cleientiaid ar strategaethau buddsoddi mewn egin-farchnadoedd a phrojectau a noddir gan yr FDIC sy'n cynnwys trafodion gwaranteiddio a gwerthu strwythuredig cymhleth.

Mae Peter yn chwaraewr pêl-droed a thenis brwd, ac yn ddarllenwr rheolaidd o gyfnodolion busnes.

Jonathan Wright (1999, Polisi Cymdeithasol / Trosedddeg a Chyfiawnder Troseddol)

Mae Jonathan yn Llywydd Rhyngwladol Hearst Magazines. Mae o'n cyn-Gyfarwyddwr Rheoli Byd-eang Dow Jones, Cyfarwyddwr News Corp’s VCCircle a Chyfarwyddwr Newspicks, lle oedd yn gyfrifol am lunio a gweithredu strategaethau twf ar gyfer The Wall Street Journal a Dow Jones tu allan i'r Unol Daleithiau.

Wedi'i ysbrydoli'n rhannol gan feddyliau am yrfa bosibl yn y fyddin neu wasanaeth amddiffyn brenhinol a diplomyddol yr heddlu, dewisodd Jonathan astudio Trosedddeg ym Mhrifysgol Bangor ond, ar ôl symud i Lundain, cafodd swydd ym maes gwerthiant hysbysebion a daeth i ymddiddori'n fawr ym musnes y cyfryngau.  Ymunodd â Dow Jones yn 2010 fel Cyfarwyddwr Gwerthiant Hysbysebu i Financial News Dow Jones  a chyn hynny roedd yn Gyfarwyddwr Cyhoeddi a Gwerthiant Grŵp gydag Euromoney Institutional Investor yn Efrog Newydd.

Jonathan yw Cyswllt ac Ymgynghorydd Rhyngwladol y Bwrdd Ymgynghorol Alumni. Mae ei gysylltiadau â Bangor yn mynd yn ôl i 1910 pan raddiodd ei hen-nain o'r Brifysgol gyda BA mewn Saesneg.

Yn ei amser hamdden, mae'n hoffi gwylio ei ddau blentyn yn chwarae rygbi ac mae'n cadw'n heini trwy ymarfer ar gyfer marathonau a phrofion dygnwch, megis beicio o Lundain i Monte Carlo. Mae'n mwynhau theatr leol ac, yn ystod ei amser yn Efrog Newydd, cynhyrchodd dair drama oddi ar Broadway.